«Кітап – қазына» акциясы
Жуалы ауданы Күреңбел, Қоңыртөбе ауылдық кітапханаларының ұйымдастыруымен көрнекті жазушы, драматург, публицист Жүсіпбек Аймауытовтың 135 жыл толуына орай «Алаштың сөнбес жұлдызы – Жүсіпбек Аймауытов» атты әдеби панорама өтті. Кеш барысында жазушы Ж.Аймауытовтың өмірбаянын №21 Дмитрий Пахомов орта мектебінің оқушысы Тамила Магамадова таныстырып, Ордабек Кәусар «Жазушыларға» өлеңін, Қадірәлі Айжан «Көшу» өлеңін, Құндыбай Медина «Ұран» өлеңін, бұрын жарияланбаған Ж.Аймауытовтың «Тез өлмен» өлеңін Даниал Қамбар, Санжар Асқар, Айбек Манатбек мәнерлеп оқып берді. №21 Дмитрий Пахомов атындағы орта мектебінің қазақ тілі және әдебиет пәнінің мұғалімі Гүлжан Сейітбекова, 10 сынып оқушысы Бейсенбек Гүлдана Жүсіпбек Аймауытовтың «Ақбілек» романындағы Ақбілек монологын образға кіріп орындады. 10 сынып оқушысы Тұрсын Айданың өз қаламынан шыққан «Жүсіпбекке» атты арнауын мәнерлеп оқып берді. №10 Күреңбел орта мектебінің оқушылары Құттыбай Айдана «Не ғып жатыр дүние» өлеңін, Қуатбек Аяулым «Елес» әңгімесінен үзінді, Әбзелбек Нұршат Ж.Аймауытовтың «Психология» кітабындағы пікірлерге тоқталды. Кітапхана оқырманы Қабылбек Әбдірахманның орындауында «Ерке сылқым» күйі орындалып, «Айару» би тобының орындауында «Өзбек» биі, «Қызғалдақ» би тобының орындауында «Қазақ» биі тамашаланды. Қоңыртөбе ауылдық кітапханасының кітапханашысы К.Айтбаева «Қазақ әдебиетінің жарық жұлдызы» атты кітап көрмесіне шолу жасап, оқырмандарды кітап оқуға шақырды. «Қазақтың таң жұлдызы» әдістемелік құрал, «Қазақтың ұлы перзенті» библиографиялық көрсеткіш, «Жарық жұлдызды Жүсіпбек» ауызша журнал, «Жүсіпбек Аймауытов – 135 жыл» атты ақпараттық-жарнамалық флайерді таныстырды. Іс шараға қатысқан ауыл тұрғындары кітапхана қызметкерлері дайындаған кітап инсталляциясын тамашалады.
